Berriak

Parlamentuko Osoko Bilkurak, SNk, Nabai-k, Bildu-k eta I-Ek alde emandako botoekin eta UPNk eta PPNk kontra emandakoekin, Lan Merkatua Aldatzeko Premiazko Neurriei buruzko 3/2012 Legearen 4. eta 14. artikuluen bat eta hiru idatz-zatien aurkako konstituziokontrakotasun errekurtsoa jartzea onetsi du gaur; Konstituzioaren 7., 24.1., 28., 35. eta 37. artikuluak urratzen dituztela eta Foru Komunitatearen autonomia arloan eragiten dutela irizten baita.

Parlamentuko Osoko Bilkurak ahobatez onetsi du gaur Nafarroako Toki Administrazioari buruzko 6/1990 Foru Legea aldatzeko Foru Lege proposamena aintzat hartzea, udaletako zinegotzien eta kontzejuetako kideen boto-eskuordetzea arautze aldera, Parlamentuko Erregelamenduan ezartzen den parlamentarioentzat xedatzen den moduan.

PPNk aurkeztu duen Foru Lege proposamenaren helburua da toki entitateen erregelamendu esparrua egokitzea, Nafarroako Parlamentuko kideen ustez, Nafarroako Parlamentuko Erregelamenduan ezartzen den egoerara.

Parlamentuko Osoko Bilkurak SNk, Nabai-k Bildu-k eta I-Ek alde emandako botoekin eta UPNk eta PPNk kontra emandakoekin, Foru Lege proposamena irakurketa bakarrean onetsi du gaur, Nafarroako administrazio publikoen zerbitzuko langileen lanaldiaren arloan presako zenbait neurri hartzeari buruzko 13/2012 Foru Legea aldatzen duena, 1.628 ordutan finkatzen dena (37,5 astean); alegia, langile eta funtzionario publikoentzat xedatutako berdinak.

Parlamentuko Osoko Bilkurak, SNk, Nabai-k, Bildu-k, PPNk eta I-Ek alde emandako botoekin eta UPNk kontra emandakoarekin, ebazpena onetsi du gaur, Nafarroako Gobernua premiatzen duena “2012a bukatu aitzin Legebiltzar honetan plan bat aurkez dezan, Osasuna futbol taldeak azken urteotan Foru Ogasunarekin metatu duen tributu-zorra ordaintze aldera, legeak ezarritako zenbatekoak eta epeak beteta”.

Parlamentuko Osoko Bilkurak, SNk, Nabai-k, Bildu-k eta I-Ek alde emandako botoekin eta UPNk eta PPNk kontra emandakoekin, ebazpena onetsi du gaur, zeinaren bidez Nafarroako Gobernua premiatzen den “ordezkari sindikalekin prozedura bat negozia dezan, bajan edo lizentzia batekin dauden langileak ordezkatzeko, halako moduan non ez den gutxituko herritarrei ematen zaien zerbitzuaren kalitatea”.

Parlamentuko Osoko Bilkurak, SNk, Nabai-k, Bildu-k, PPNk eta I-Ek alde emandako botoekin eta UPNren abstentzioarekin, ebazpena onetsi du gaur, zeinaren bidez Nafarroako Gobernua premiatzen den “abenduaren 31 baino lehen Legebiltzarrean aurkez dezan Nafarroako Kultur Ondareari buruzko urte anitzeko plan berri bat, 2011ra arte indarrean egongo denaren ordez”.

Parlamentuko Osoko Bilkurak, UPNk, SNk, Nabai-k, Bildu-k eta PPNk alde emandako botoekin eta I-Eren abstentzioarekin, Nafarroako Gobernua “2013-2016 urteetarako Inbertsio Publikoen Planean egin beharreko proiektuen bideragarritasun azterlan bana erants dezan” premiatzen duen ebazpena onetsi du gaur.

Bildu-k neurri hori “Nafarroa 2012 Planean bukatu gabe gelditu diren lanetara” zabaldu nahi izan du; baina ez da aurrera atera, PPNk ez baitu horri zegokion aldaketa zuzenketa onetsi.

El Parlamentuko Osoko Bilkurak ebazpena ahobatez onetsi du gaur Nafarroako Gobernua premiatzen duena “Nafarroako autonomia erkidegoko izatezko bikoteen erregistroa sor dezan, Bikote egonkorrentzako berdintasun juridikoari buruzko uztailaren 3ko 6/2000 Foru Legeko xedapen gehigarri bakarrean jasotzen denari jarraiki”.

Parlamentuko Osoko Bilkurak SNk, Nabai-k, Bildu-k eta I-Ek alde emandako botoekin eta UPNk eta PPNk kontra emandakoekin, ebazpena onetsi du gaur zeinaren bidez Espainiako Gobernua premiatzen den “egiazki aplika dezan 16/1985 Legeko bosgarren xedapen iragankorrean xedatutakoa, Ondare Historikoa bere osotasunean eraginkortasunez babestea ziurtatze aldera”.

Parlamentuko Osoko Bilkurak ebazpena ahobatez onetsi du gaur, zeinaren bidez Nafarroako Gobernua premiatzen den “hedabideen sektorearen lan egoeraren gaineko azterlan bat egin dezan”.

Azterlanak, besteak beste, honakoak jasoko ditu: “profesionalen kopurua, jardunean nahiz langabezian daudenena; horien jarduna arautzen duten hitzarmenak; gerta daitezkeen egoera irregularrak; lan baldintzak eta baldintza ekonomikoak eta sektorearekin lotutako enpresak”.