“Nafarroako Parlamentuko Erregelamenduaren 26.2 artikuluan jasotzen den Jokabide-kodea aztertzeko eta onesteko” ponentzia eratu da gaur.

Ponentziak Unai Hualde Nafarroako Parlamentuko lehendakaria aukeratu du presidentetzat, eta Silvia Doménech legelari nagusiak lagunduko dio, idazkari gisa.

Erregelamenduaren 64. artikuluaren arabera, Ponentzia agindu zaion lana bukatu arte arituko da lanean, eta lan hori amaituta eta txosten batean jasota egon beharko da ponentzia eratu eta sei hilabeteko epe luzagarrian. Aho batez onetsi diren arauen arabera, erabaki guztiak boto haztatuaren bidez hartuko dira, baina Parlamentua osatzen duten kideen hiru bostenen gehiengoarekin (30 boto).

Era berean, txostena egin ondoren, ados ez dauden legebiltzar-taldeek beren desadostasunak aurkez ditzakete, zuzenketak aurkeztuta. Zuzenketak txostenarekin batera eztabaidatu eta bozkatuko dira. Onartutako txostena Legebiltzarreko Mahaiari jakinaraziko zaio, Legebiltzarreko Aldizkari Ofizialean argitaratzeko eta Erregelamendu Batzordeari helarazteko, 26.2 artikuluan aurreikusitakoaren arabera.

Ponentziako kideek abiapuntu edo oinarri gisa darabilten materialaren artean daude Nafarroako Parlamentuaren Erregelamendua, zerbitzu juridikoen txostena eta lehendakariak maiatzean aurkeztutako proposamen-zirriborroa, Europako Parlamentuaren, Gorte Nagusien eta Kataluniako eta Kanarietako legegileen jokabide-kodeak.

Halaber, Europako Kontseiluaren Ustelkeriaren aurkako Estatuen Taldeak (GRECO) Espainiari buruz onartutako Ebaluazio Txostena (2013) ere aintzat hartuko dute; baita Legebiltzarreko Jardunbide Egokien Printzipioak eta Etika dokumentua ere, Nazioarteko Gardentasuna GKEren ustelkeriaren aurkako lege- eta gizarte-neurrien batzordeak egina; eta Kode etikoak edo jokabide-kodeak legebiltzarretan inplementatzeko beharra artikulua ere bai, Gaztela Mantxako Gorteetako zerbitzu juridikoen zuzendariarena (2017).

Ponentzia eratu ondoren, hurrengo bilkura-aldiko lehen mahaiari dei egin zaio irailaren 2an, 10:00etan, noiz jarraituko duen erabaki dezan.

Ponentzia ekainaren 5ean sortu zen Foru Araubidearen Batzordean, UPN, PSN, EH Bildu, Geroa Bai eta Contigo-Zurekin alderdiek proposatuta, UPN, PPN eta Voxen babesarekin.

Talde guztiek uste dute ponentziaren formatuak esparru egokia eskaintzen duela Ganberaren barne bizitza arautzen duen estatutuaren 26.2 artikuluaren "garapena sakonki jorratzeko".

Indarrean dagoen eta 2023ko martxoaren 16an onetsi zen Erregelamenduaren 26.2 artikuluak honela dio:

Erregelamendu Batzordearen eginkizuna izanen da jokabide-kode bat onestea. Jokabide-kode horrek arautu beharko ditu, gutxienez, interesak, bateraezintasun araubidetik eta jarduera eta ondasun aitorpen-agirietatik eratorritako eginbeharrak betetzea eta urraketa kasuetarako prozedura eta ondorioak.