Berriak

Parlamentuko Osoko Bilkurak aho batez onetsi du gaur elikagaien hondakinen erabilerari buruzko Foru Legea, Nafarroako merkataritzari buruzko 17/2001 Foru Legea aldatzen duena.

Izquierda-Ezkerrak aurkeztutako ebazpenaren (PPNk zuzendutakoa) xedea da Nafarroan sortutako elikagaien hondakinak ahalik eta gehien murriztea eta egoera zailean dauden herritar guztiei elikadura egokia bermatzea, izan ere, azken datuen arabera, Nafarroako biztanleen % 18 “pobrezia arriskuan” dago.

Parlamentuko Osoko Bilkurak, SNk, Bildu-k, Aralar-Nabaik, I-Ek eta atxiki gabeko bi parlamentariek haren alde emandako botoekin eta UPNk eta PPNk haren aurka emandako botoekin, Nafarroan bizi diren pertsonei Nafarroako osasun-sistema publikoan doako osasun-laguntza jasotzeko eskubidea aitortzen dien Foru Legea onetsi du gaur.

Parlamentuak ebazpen bat aho batez onetsi du gaur, zeinaren bidez Nafarroako eta Espainiako Gobernua premiatzen diren “2001/37/CEE Zuzentarauaren aldaketaren garapenari dagokionez erne egotera, tabako-sektorearen interesak bermatze aldera, hartara, aldaketa horiek enpleguan izan litzaketen eragin kaltegarriak saihesteko”.

Onetsitako ebazpena SNk, ekimenaren titularrak, onetsitako eta talde guztiek sinatutako in voce ordezkatze-zuzenketa baten ondorio da.

Parlamentuak ebazpen bat aho batez onetsi du gaur, zeinaren bidez “bere mespretxua eta gaitzespena erakusten dizkie beren egoeratik probetxua atera eta beraien aurrean babesgabe dauden herritarren diru publiko zein pribatuarekin irabaziak lortze aldera ustelkeriazko jokabideak aurrera eraman dituzten edo eramaten ari diren pertsona, entitate, alderdi edo enpresa publiko nahiz pribatu guztiei, zeinek horretarako baliatu baitituzte beren kargu publikoak, botere politiko nahiz ekonomikoa, botere horretan daudenekiko hurbiltasuna, informazio pribilegiatua edo beste edozein arrazoi”.

Parlamentuko Osoko Bilkurak ebazpen bat aho batez onetsi du gaur zeinaren bidez Nafarroako Gobernua premiatzen den “ez diezaien dietarik ordaindu bilkuretara joaten ez diren Nafarroako Enpresa Korporazio Publikoko administrazio kontseiluetako kideei”.

Mozioak bigarren puntu bat zuen, bideratuta zegoena “bertan behera utz dezan” aipaturiko administrazio kontseiluetan, “Nafarroako Parlamentuko kideei ezarritako dieten ordainketa”. Puntu hori UPNk eta SNk haren aurka emandako botoekin bazter utzi da. Bildu-k, Aralar-Nabaik, PPNk eta atxiki gabekoen babesa ez da nahikoa izan.

Parlamentuko Osoko Bilkurak, SNk, Bildu-k, Aralar-Nabaik, PPNk eta atxiki gabeko parlamentariek haren alde emandako botoekin eta UPNk eta PPNk haren aurka emandako botoekin, Nafarroako Gobernua “Osasun Departamentuak ospitale arteko garraio zerbitzuaren kostuaren osotasunean bere gain har dezan” premiatzen duen ebazpena onetsi du gaur.

Parlamentuko Osoko Bilkurak, Bildu-k, Aralar-Nabaik, PPNk eta I-Ek haren alde emandako botoekin, SNren eta atxiki gabekoen abstentzioarekin eta UPNk haren aurka emandako botoarekin, ebazpen bat onetsi du gaur Nafarroako Gobernua premiatzen duena “egokitu dezan Nafarroako legedia abenduaren 28ko 1723/2012 Errege Dekretuan ezarritakora. Errege Dekretu horren bidez arautzen dira transplanteetarako giza organoak lortzeko jarduketak, haien erabilera klinikoa eta lurralde-koordinazioa, eta kalitate- eta segurtasun-betekizunak ezartzen dira”.

Parlamentuko Osoko Bilkurak ebazpen bat aho batez onetsi du gaur zeinaren bidez Nafarroako Gobernua premiatzen den “Foru Komunitatearen intereseko deklara dezan ‘Traperos de Emaús’ Fundazioa hondakinak berrerabilerarako prestatze aldera Berriozarren sustatzen ari den proiektua, eta han eginen diren inbertsioen portzentaje bat finantza dezan, kontuan hartuta inbertsio horrek gizarte, ingurumen nahiz ekonomiaren arloetan egiten duen mesede garrantzitsua, lanpostu kopuru handi bat sortzea aurreikusten baita”.

Parlamentuko Osoko Bilkurak, UPNk, SNk, PPNk, I-Ek eta atxiki gabeko bi parlamentariek haren alde emandako botoekin eta Bildu-ren eta Nabai-ren abstentzioekin, ebazpen bat onetsi du gaur zeinaren bidez Nafarroako Gobernua premiatzen den “Nafarroaren Egunaren karietara programatutako ekitaldiak eta erabilitako irizpideak ebalua ditzan”.

Parlamentuko Osoko Bilkurak, SNk, Bildu-k, Aralar-Nabaik, I-Ek eta atxiki gabeko bi parlamentariek haren alde emandako botoekin, eta UPNk eta PPNk haren aurka emandako botoekin, ebazpen bat onetsi du gaur zeinaren bidez Nafarroako Gobernua premiatzen den “bere gain behar besteko aurrekontu-konpromisoa har dezan, Nafarroako irakaskuntza unibertsitarioko eta ez-unibertsitarioko ikastetxe publikoei emate aldera beren eginkizunak garatzeko behar dituzten baliabideak.